गोरबोली कविता " प्रेमज्योती" लखनकुमार जाधव #Gorboli Poem " PREMJYOTI" Lakhankumar Jadhao
गोरबोली कविता
प्रेमज्योती ...... (कविता)
..............लखनकुमार जाधव
तू नानकीया, म मोटो
वाते बना कामेरी |
वडन मातेप बेसजाय देकलं
धूड पगे हेटेरी ||
रीस तो आंगार छ
वोम मत बळेस |
रीसागे जेन मीटो बोलन
मानतो वीय तो मनालेस ||
झाड कनायी वेटेनी
नाम वीचारन फूल |
हाम पणन सदरे कोनी
करा पगे पगेम भूल ||
धर्म नाळी भाषा नाळी
तो बी हामेम एकी छ |
नाळी नाळी रंग छ तरी
बेकी छेनी, नेकी छ ||
जो रचं खरो प्रेमेती
वोन तो प्रेमज मळचं |
प्रेम नगदी व्यवहार छ
जू भेळीया जू भळचं ||
सारी वातेम भगवान
नाने मोटेम वसरोचं |
मनकीया का खोटी नाटी
वाते मायी फसरोचं ||
वाते ती वाते बडचं
शांत स्वभावेती रेणू |
रीसेती वाढं रीस
प्रेमेती प्रेम देणू ||
घणो आचो वाटं जना
दीवे ती दीवो बळचं |
एक दीवेर वजाळो जना
दूसरेर आंधारेन मळचं ||
©️®️ लखनकुमार मा. जाधव
मु. दुधागिरी तांडाता. पुसद जि. यवतमाळ
मो. 9763437420
*********
माहिती संकलन:-
किशोर आत्माराम नाईक
गोर बंजारा संस्कृती.
गोर बंजारा संस्कृती.
टिप्पण्या
टिप्पणी पोस्ट करा