गोर बंजारा साहित्य " घुगरी घालेरो" .. राहुल सिंधू पालतिया #Gor_Banjara_book "#Ghugri_Ghalero"

 गोर बंजारा साहित्य

घुगरी घालेरो

लेखक:- राहुल सिंधु पालतिया

पो. नि. यवतमाळ..8888092427.

प्रस्तावना.  मा.भिमणी पुत्र मोहन नाईक
आंतरराष्ट्रीय गोर लेखक, साहित्यिक
समीक्षा.✍ याडीकार पुसद......... 9421774372

        राहुल सिंधु पालतिया पोलीस निरीक्षक मु.पो.जिवती जिल्हा चंद्रपुर ह.मु.यवतमाळ लिखित...✍घुगरी घालेरो. ई पुस्तक गोरबनजारा समाजेमाई रंडीरंडायी बाईन देवरेती घुगरी घालन न्याय देरेर जगेमाईर ई गौरवशालीप्रथा. चकेन अभिमान वाटेवाळी प्रथा,रूढीर आधारेप लकोलकाय पुस्तक छं . सदर पुस्तकेन मा.आंतरराष्ट्रीय गोर लेखक भिमणीपुत्र मोहन नाईक साहेबेर प्रस्तावनाती ये पुस्तके र महत्त्व बढगोछं. ये पुस्तके र आंग राहुल 11 मे 2018 म "तांडो" नामेरो कविता संग्रह काढो. वु भी खुब गाजमेलो छं . पोलीस दलेम नौकरी करेवाळे मनक्यान बाटी खायेन फुरसत रेयेणी तरी राहुल नौकरी संमाळन तांडो कवीता संग्रह लखन थांबेणी.  तो ऊ जगेमाईर गोरूर नारीन न्याय देवाळ घुगरी घालेर प्रथाप एक जिवती गामेकनेर नागपूर तांडेमाईर  22 वरसेर रंडीरंडायी छोरीसंगीतार एक दर्दभरी😢😢😢😢 कहाणी ये पुस्तके मांडन तमाम गोर गणेमाई विचारेर पेरणी करछं.  ईज वात आपळें समाजे सारू मोठछं. आपळे समाजेम अनेक अधिकारी हेगे पण राहुल सरीक अधिकारी हेणो समाजेर भुषण छं. करण म राहुल पालतियार अभिनंदन करूछु..💐💐💐💐
                तांडेम रेहेवाळो राहुल  तांडेमाई जगणो, मरणो, व्यथा,वेदना,दु:ख,सुख कनेती देखेर कारण वु.घुगरी घालेरो ई एक खरो समाजेर चित्रण मांडमेलोछं.एखादी बाईर धणी जर मरगो तो वो बाईन सती न जाता वोरे देवरेर घुगरी घालन वोरो जिवन हारो भरो रकाडेर जबाबदारी तांडेमाईर नायक,कारभारी,डायेसाणे, डायसाणी,लेमेलेछं.  ई वात वो नवयुवकेन ये कथा माईती कछं.  आपळ गोरूर वहीवाट कतरी आछ  छं वो ये कथामाईती मांडन जगेन दखाळदिणे छं. ई कथा फक्त कथा छेणी तो तांडेमाई बाईप अवेळी आयेवाळे संकटेमाईती निकळेरो मार्ग  दखाळेम लेखक यशस्वी हेगोछं. ई कथा लकन लेखक  गोरूरी जुनी वहीवाटे जगेमाई कतरी सुंदर, न्याय देवाळछं येरो विवेचण समाजेर मुंडाग लाणतांणी  समाजेन अंधारेमाईती वजाळेसामु कु जातु आय येरे वाश घुगरी घालेर रितेरो पुस्तक लकन समाजेर ऋण फेडेरोप्रयत्न लेखक करमेलोछं . लेखक ये पुस्तके माईती,तांडेमाईर नवयुवकेन चिकित्सा करण विज्ञानवादी बनेरो संदेश दिणोछं. मंजे लेखकेन पे बँक टु सोटायटी नुसार तांडेरो विकास हेये सारू सारी अधिकारी न आव्हान करमेलेछं. मार तांडेम आजही मनक्या समागो जणा शिकवाडी दछं. ई मानवतावादी प्रथा आजही जिंवत रकाडमेलेछं.

          ' मुयेन मटी, जिवतेन बाटी ' 

                 ई जुनेमनक्यार तुकारी आजही तांडेमाई कु लेन सारी लोक चालरेछं येरो जिवंत उदाहरण मंजे ई घुगरी घालेर पुस्तके म खुबछ आछे तराती मांडन तमाम मानवजाती माईती फक्त गोरगणेमज ई प्रथा छं ई येरो  संपूर्ण सार लखताणी लेखक तमाम गोरगणेन विचार करेवाश भाग पाडनाको छं.थोडक्याम कथा हाणु छं.

घुगरी घालेरो 

कथा............

               चंद्रपुर जिल्हा माईर जिवती गामेती दस कोसेपरेर नागपूर तांडेम  रमेश संगीतारो हारोभरो संसार रछं. एकदन संगीतार घरेती फोन आवछं करन संगीता ओर धणीन कछं की मन मार मायरेण जायेछं. छोरी वाश जिवतीती कपडा लादं वु कपडा लेयेवाश मोटार सायकलेती जिवतीन झपाटेती जातुवाळा वोरो अपघात हेजावछं. वु वोमाई मरजावछं.  तांडेन खबर लाग जणा तांडेमाई मनक्या,बाईमनक्या,ड़ोकरा डोकरी चक धासन जावछं जणा संगीतान आन वोर सासुन कळजाछं की काई तरी घटना हेगीछं करन संगीता एक छोरी आन वोर सासु दुसर छोरीन गोदेम लैन जाताणी जत रमेश मरण पडो वत जाण आल्लडा आल्लाडन रोवछं..😢😢

मन आदी वाटेन छोडन.चलेगो हँहँहँहँहँ...
तारे छोरीन कुन पोसीय, तार छोरी आब केन बां किय हँहँहँ..।
        ई ढावळो मनक्यार कळजो चिरणाकाछं हुबे जकोण लोकछं कोणी तो पुस्तक वाछेवाळेरभी आखीम पाणी लायेर काम लेखक ये घटनाम करणाकोछं.
               मन भी मारे सोबत लेजो ..हँहँ..हँ..तारेभिणा मन जगेर छेणि  आसो दर्द भरो ढावलो.संगीता कर जणा वो तांडेर नायकण कछं. तु हानु करीश तो कु हिय बेटा,तारे दोई छोरी सामु देख,जायेवाळेन कुण रोक सकछं जलम-मरणो चालतोछं, आब घर चाल बेटी, ई ताकद भरी वात वत नायकण कंछ. येपर ती ये गोरसमाजेर कतरी पंरपरा ऊजवल रं ई लेखक राहुल सिंधु पालतिया पानेपानेम मांडमेलोछं. संगीतार दु;ख केतु केतु लेखक गोरगणेर पंरपरा,रूढी कतरी आछं र येरो रसभरो वर्णन मांडमेलोछं नहीतो ये कथाम नुसता रोणो धोणो र तरीही लेखक रोणोधोणो न मांडता गोरूर गौरवशाली पंरपरा मांडेती ई पुस्तक घणो एतेहासीक बनोछं. येरो संदर्भ ग्रंथ करण आंग वापर हिय आसो मन मनोमन वाटछं.

             रमेशन घर लावछं संगीतारो आकात करणो,दातखिणी😢😢 लागणो चालुछ रछ. आन वशेमाई रमेशेन आगणी देयेर वेळा रछं. रमेशेन दि छोरी छोरा न रेयेर हेती आब आगणी कुण द करन मठीपरेर लोक नायके सामु देखुकरछं जणा...नायक कछं....
      .......राधा बेटा तार बापेन आगनी दं...
ई आतरी मोठ वात आजही हजारो वरसेती तांडो टिकाण रकाडमेलोछं.  ई लेखक ये पुस्तके माईती समाजेन दखाळछं.  संगीतार रोवणो थांबेणी.😢😢रमेशेन आगणी 🔥🔥🔥देन घर चक लोक आवछं  तांडेरो नायक शिकवाडी दछं..
        सांमळो गोरभाई भेनो....आब रोवो धोवो मत पाडे सरीक पडावु ढळगेछं..मुयेन मटी.... जिवतेन.बाटी..... कनीराम.तु घरेर करता छी. दाडो तिन दनेरबाद ..चकेन कळादो...ई शिकवाडी आत कमी शबदेम मांडोछु तमेन पुरो शिकवाडी वाछेवाश पुस्तक लेणो गरजेरछं. आतरी आछं शिकवाडी गोरगणेर लेखक अत्यंत सुंदर तराती मांडमेलोछं.

रमेशेर छोरी संगीतान कछं
    "या बा कना आवच यें,मन बा हारदारो छं...😢😢
जणा संगीतारो कळजो टकडा टकडा हेजावछं. हानु नानकीश छोरी केन रोये हेती सारी घर रोये लगजावछं सारी तांडो जमा हेजावछं करण . जागा बदलायेवाश.. संगीतान वोरे मायरेण मेलदछं जातुवळा संगीतार दोई छोरीर दादा कनीराम गालेर लाड करतु आकाम पाणी लेन कछं😢😢😢😢
      "जलदी घर वापस आवो बेटा." हानुकेन तो वाट लगाडदछं पण  कनीराम डोकरान निंद आयेणी.वु नायकेर घर जाण वोर चिंता मांडछं वोर नायक कछं.  कनीराम ... काळजी कळेर काई गरज छेणी आपणो गोरसमाज कनाई छोरीप,बाईपर अन्याय किदो कोणी, हानु छोरीपर काळ आवगोतो वोपरभी ईलाज तानडेमाई पेनाती करते आमेलेछं..
आतरी मोठ वात नायक कनीरामेन कछं आन तांडेर कारभारी डायसाणे येंदुन.बलान संगीतान रमेशेर नानक्या भाई विक्रमेर घुगरी घालेम आरीछं दन दितवार.हानु जाहीर करछं ई वात  लेखक खुबछं खुबीती मांडन गोरपंरपरारो पाने पानेप जय जयकार.करमेलेछं .कोई तोभी कछं. आरे विक्रम तयार छं काई देखो भा. जणानायक कछं विक्रम तांडेम जलमोछं तांडेर शिक वोर लोईम छं न्याय देणो,संकटेती लढणो ई तांडेर लोउमछं वु कोणी के सकेणी वोन बलान लावो. जणा तांडेमाई छिछाबर वोन बलायेन जावछं.
       विक्रम एम.ए.ईतीहास शिकेवाळो छोरा वोन. राजाराम मोहन राँयर सती प्रथा, महर्षी धोंडो केशव कर्वे येंदुर विधवा पुनरविवाह प्रथा आसे समाज सुधाकरेण माणेवाळो, ,ईतीहास शिकेवाळो विक्रम तांडेम घाई घाईत आन नायेकण कछं मन तांडेमाईर वहीवाट आची छेणी ....... 

आपण चोको कसेन पुराचा?
समनक कसेन कराचा?
भतकोला कसेन कराचा?
धपकार का दाचा?
आसे वाना वानार वाते विक्रम नायके मुंडाग मांडछं आत लेखक आतरा जबरदस्त नायकेर भुमीका नायक मांडमेलेछं की विक्रमेर चक प्रश्न उत्तर गोरूर वदाई गिद केतांणी छडावछं.
        कुळी आवे,कुळी जावे,कुळी माई जोत सवाई. विक्रमेर सारीवातेर उत्तर नायक देण वोन कछं आपणो तांडेर बाजुरो धोंडाअरजुनी तांडो, पेद्धाआसापुर तांडो , आरणी तालुका माईर आंबोडा तांडो, माई घुगरी घालेरी प्रथा पार पडन वोदुंर कुंटुब आचे तराती रेरेछं. आन रमेशेर वियाम तोन सुईरो दंडेप चटका दिणेछं आतरा नायक केते बराबर विक्रम घुगरी घालेन तयार हेजावछं. विक्रमेर मुंडेमाईर प्रश्न ये विक्रमेरच छेणी तो तमाम गोरगणेर तांडेमाईर युवकेर प्रश्न लेखक ये साकीम अभ्यास पुर्ण तराती मांडन संवेदनशील मनेर वो दखान पडछं  पछं संगीतान माहेरेती विक्रम जाण कु लावछ बाटी खातु खातु संगीता वीक्रमेन काई बोलछं विक्रम वोन काई उत्तर दच ये सारी वाते लेखक खुबच आछे तरातीमांडमेलेछं.
ई पुस्तक 52 पेजेर छं प्रत्येक. पान वाचनीय छं गोरूर गोरबोलीरो ई पुस्तक माईर वातेरो अर्थ मराठी केमेलेयेर हेती मराठी साहित्य म सुद्धा येरो स्वागत हिय,मराठी अभ्यास क,संशोधक ये पुस्तके र जरूर दखल लिय.
       संगीतार बाप कंछं. बेटी तार वय कमी छं एकलेन आवढा मोठो आयुष्य कटेणी जे रमेशेर घरेवाळ ठरायेच वोसो करलं ...बेटा.😢😢     आसी प्रंचड वेदना दायी वाते लेन आपण गोरूर पंरपरा जपेवाळ नायक,नायकण, कनीराम ,विक्रम  आन  नागपूर तांडो ये चक पात्र सिनेमामाईर वाटछं पछं संगीतार विक्रमेती घुगरी घालन नायक  शिकवाडी दछं
           " संगीता विक्रमेर गोरणी रिय." 
विक्रम तोन रमेशेर छोरी सोतार करण वगायेरछ वोंदुम कनाई वेला पाडेस मत,वोंदुन शाळा शिकाण मोठ सायबण  बणायेस,
        आस शिकवाडी दछ़ ई तमाम मानवजातीमाईती फक्त गोरूर नारीन न्याय देयेवाळ प्रथा   जगेर पुठेप आपणे समाजेमाईछं येरो ये पुस्तक वांछनं गर्व वाटछं पण लेखक आत एक खंत व्यक्त. करछं की  ई 5000 हजार वरसेती चलीआरी आतरी गौरवशाली नारीन न्याय देवाळ पंरपरा समाजेम न लकेवाळ रेयेती दुसर जातीर लोक ये परंपरा चोरण समाजसुधारक हेगे.

आब तांडे तांडेम जणा जणा वियाम वदाई करछं जणा जणा गोरू नवतरूणेन ई वदाई प्रथारो खुलासो करण घुगरी घालेरी प्रथान वजाळेम रकाडन गोरूर नारी परेर संकट दुर करणो आतराछं ये पुस्तके माईती लेखकेन केयेर ईवात लेखक ये पुस्तके माध्यमेती गोरूताणु पुचानाकेछं.  ईवात वतरीछं खरछं .संवेदनशील मनेरो लेखक तांडेमाई आजी भक्कम सारी.परंपरा लेन जगरोछं मन वाटछं.की आयेवाळे दणेन लेखक राहुल सिंधु पालतिया आजी खुब दरजेदार गोरूरो साहित्य निर्माण करीय आस म सेवालाल चरणी प्रार्थना करूछु.
      पुस्तक प्रकाशक. मनोहर चव्हाण गोरबंजारा प्रकाशन नागपुर. 9689668629. किंमत....50  रपीया.
समीक्षा करेवाळो.✍✍✍
पंजाब चव्हाण याडीकार पुसद.95523027.

माहिती संकलन, प्रसार व प्रचार

किशोर आत्माराम नायक 
गोर बंजारा संस्कृती