गोर बंजारा साहित्य.. " केसुला मोराये!.. काशिनाथ नायक #GorBanjaraBook" Kesula moraye! .. Kashinath Nayak
पुस्तक परिचय_📖📖📖_केसुला मोराये !
लेखक:- काशिनाथ नायक ..गोर शिकवाडी वचारी
.,..........................................................
गोर शिकवाडीर माध्यमेती गोर बंजारा समाजेम जुने विचारेर समण घालन आजेर घडीम कु जगताय , कु समाजेन आचे मार्गेम लातू आय, समाजेर परंपरा- धाटी कु टिकाताय येर सारू अनेक वचारी तांडोतांड जाताळी गोरून जगायेर काम कररेच. काशिनाथ नायकेर नाम आजेर वकतेम पेलो आवच...
याडीकार पंजाब चव्हाण " केसुला मोराये" ये पुस्तकेर समिक्षा लकेते.. जनातीच काशिनाथ नायक लकमेलो जोकोण इ पुस्तक वाचेर आन समजन लेयेर खुप इच्छा र.. शिवनारायण भियार ' धोळी बुक सेंटर ' येर कनेती पुस्तक मंगान वाचन काढो. गोरबोलीम सतगरु सेवालालेर विचार आतरा विस्तारपणेती ये पुस्तकेम मांडमेलोच की वाचन विचार करेन लगाडेर ताकद ओंदूर लकणीम छ. पुस्तक वाचेर बाद जे मनेम विचार आय उच आत मांडरोचू..
पुस्तक विचार
गोर शिकवाडीर विचारधारा काइ छ?.. शिकवाडीर काम काइ? शिकवाडी का काडे? ओर उद्देश काइ? ओमाईती काइ वे सकच? बापदादा, डायसाणे काइ केगे? आपणेन कु रेवू लागय? सेवाभायार बोल काइ र? आजेर घडीम गोरून ओ विचारेर गरज का छ? सेवाभाया कुणसी वाते गोरुन केगो? हाम ओरो काइ आरथ काडे?....
आसी घणी वाते र खल काशिनाथ नायक
....... केसुला मोराये! ...
ये पुस्तकेर माध्यमेती गोरू समोर लायेर कोशिस करमेलोच. पुरे पुसतकेर २१.. एकविस भागा करन.. सेम आलगआलग विचार आन गोर कुळीन ओर गरज कु छ! येर उकल करेर घणो आचो कोशिस किदो च.
....केसुला मोराये!......
" मुवो मलक सरजीत करीव, अन गोरुन केसुलानायी मोरायुं " हानू सतगरु सेवालाल केगो . गोरुन केसुलानय मोरायं सारु काइ करु लागय , कु करु लागय येर से आपणेन सतगरु निती नियम केगोच . पण हाम सतगरु सेवालालेर विचारेन गोरुताणी पुचायेम कततरी कमी पडगेचा. आजबी जुनेजाणता ओ वाते जिवडाम जतन करन रकाडमेलेच. आपण काल- परम काइ किदे इ वात हारद रेयनी.. पच बाप - दादा, याडी- दादी हजारो सालेरी वाते हिवडाप जतन करन रकाडमेलेच . येरो आरथ वो मातेम बेसगी ,कळजेप कोरागी करन आजबी जिवती छ.. सतगरुर वातेर समण घालन आजेर घडीम काइ करताय येर विचार हाम करेन चाय. येरो उकल काशिनाथ नायक आपणे वचारेम मांडमेलोच....
केसुला.... ..... उनाळेर मात आलमदनीयामाईर से डुंगरदरीया तावडेम तपन सुका जावच? झाड- झुडपा वगाडेपडजावच? पाणी आटजाव, चारो सुकाजावच! आसे काळेम ढाकडार झाड मोरेन लगजावच... चारी वडी जंगल दडीयाम केसुला मोरायेन लगजावच.. निसर्गेर इ चमत्कार छ.. येरच विचार करन सेवाभाया को . गोर मेहनती छ . ठाण लिदो जोको करेवाळो छ. ओर सारू झटेवाळोछ. भरोसेती आंग बडेवाळोछ. सारी दनीया थकगी, हात टेकदीनी तरी गोर ओ घडीम भी केसूलानयी मोरेर ताकत रकाडेवाळो छ.. सेवाभायार बोलेर आजेर घडीन गोरुर गरज छ. इ वात काशिनाथ नायक केसुलानयी कना मोरावूं को? ये भागेम केमेलोच..
सतगरु सेवालालेन गोरून आंग लायेर र, से हालतेती लडेन तयार करेर र, कुणसबी घडी आइ तो ओती दी हात करेर गोरुम ताकद छ. गोर नंगरीर नायक, गोरुर संग, गोर वयीवाट, गोर बोली, धोकणू, सिकवाडी, गोरुर कांयी गंळ.. ये वातेर विचार काशिनाथ नायक आंग पुस्तकेम केमेलोच..
पुस्तक वाचते गे तो सेवाभायार बोल आपणेन जिवनेम काइ बदल घडासकच येर उकल आचे तराती वेती जावच ..
" केसूलानांयी कना मोरांवू को?....काहा मोरांयू को?
आजेर घडीर गोर देकेतो केरीन न केरी लार धासते दकारेच . केरी पगू पडते हिंडरेच, आचेबलान पुजते हिंडरेच.. केरीकेन ताळमेळ छेई.. सेवालाल महाराज टो जू जर गोरून मोरेर वीयतो. आपण कुळी काई छ, कुळीर रीत काई छ, येर विचार करन वागणूक रकाडणू तोच गोर करन टक सकाचा.. एकमेकेर आधारेती , आसरो लेन देन आंग बढू लागय तोच गोर केसूला नयी मोर सकच.. इ वात फोडकरन लकमेलोच..
आजेर घडीम गोर, गोर वयीवाट भुलाडी पडती जारीच.. गोरुम इ वेळ काहा आयी? येर लारेर कारण काइ? आपण कत कमी पडगे? येरलारेर घडीवाते कु घडायेम आयी येरो विचार मांडेर काम काशिनाथ नायक पुस्तकेम करमेलोच...
आपण वयीवाट, गोरबोली , गोरुर गोरपण टिकायसारु करेसरीक वातेर विचार , सेवालाल महाराजेर विचार आजेर घडीम गोरुर जिवणेम वतारेसारु काइ काइ करताय येर आचो खल " केसुला मोराये" ये पुस्तकेम लकमेलेच..
गोर प्रकाशन , मालेगाव रोड, नांदेड येनूर सामूती प्रकाशित इ १०८पानेर पुस्तक वाचेसरीक छ. गोर सिकवाडी र विचार, सिकवाडी, गोर सिकवाडीन लेन काशिनाथ नायकेर वचार समजन लेयेसारु "केसूला मोराये! " इ पुस्तक नक्कीच वाचेन चाय.. काशिनाथ नायक आन गोर सिकवाडीर कार्य आंगेर काळेम हानूच आचो चालणो आन आंगेर काळेम गोरुन सेवाभायार विचारेर वाट वतायेर , गोरुम गोरपणो जगायेर काम चारतो रेणो इच सेवा सायीच्छा!!!
पुस्तक मळेर ठकाण.. धोळी बुक सेंटर, परतवाडी (9765708482)
किशोर आत्माराम नायक
गोर बंजारा संस्कृती
टिप्पण्या
टिप्पणी पोस्ट करा